काठमाडौं, २६ कात्तिक । सरकार र दुर्गा प्रसाईं नेतृत्वको समूहबीच गृह मन्त्रालयमा वार्ता जारी छन् ।
वार्तामा दुर्गा प्रसाईं स्वयं सहभागी नभए पनि उनको पक्षबाट माधव प्रसाद खतिवडाको नेतृत्वमा टोली सहभागी भएको छ । टोलीमा देवी प्रसाद संग्रौला, प्रेमकुमार थाम्सुहाङ, प्रेम थापामगर, तिजेन्द्र प्रसाद रायमाझी र मकबुल साह लगायत सदस्य छन् ।
टोलीका संयोजक खतिवडाले गृहमन्त्री ओम प्रकाश अर्याललाई मागपत्र बुझाएका छन्, जसको विषयमा हाल छलफल भइरहेको छ । यसअघि, सरकारका तर्फबाट १८ कात्तिकमा प्रसाईंले सञ्चालन गरेको “नागरिक बचाउ महाअभियान” लाई औपचारिक पत्र पठाई वार्ताका लागि बोलाइएको थियो ।
तर मन्त्रीस्तरीय वार्तामा प्रसाईं सहभागी नभई खतिवडाको नेतृत्वमा टोली पठाइएको हो । गृह मन्त्रालयका प्रवक्ता आनन्द काफ्लेले पनि प्रसाईं समूहसँग वार्ता भइरहेको पुष्टि गरेका छन् । वार्ताको सहजीकरण अधिवक्ता लवन न्यौपाने र विनोदमणि भट्टराईले गरिरहेका छन् ।
