बारा, २ कार्तिक । नेपाल पत्रकार महासंघ बारा शाखाले जिल्ला प्रहरी कार्यालयका प्रमुख (एसपी) सन्तोष तामाङको कार्यशैलीप्रति कडा आपत्ति जनाउँदै उनको व्यवहारले जिल्लाको प्रेस स्वतन्त्रता र सार्वजनिक शान्ति–सुरक्षामा गम्भीर असर पारेको आरोप लगाएको छ ।
महासंघले प्रमुख जिल्ला अधिकारीमार्फत प्रधानमन्त्री तथा मन्त्रिपरिषद् कार्यालय, गृह मन्त्रालय, र सूचना तथा सञ्चार मन्त्रालयमा ध्यानाकर्षण पत्र पठाउँदै एसपी तामाङको कार्यशैलीप्रति छानबिन र तत्कालीन हस्तक्षेपको माग गरेको छ ।
पत्रकार महासंघका अनुसार एसपी तामाङ शान्ति सुव्यवस्था कायम गर्ने आफ्नो मूल कर्तव्यभन्दा बाहिर गई अवैध धन आर्जनमा संलग्न भएको, र यसबारे समाचार लेख्ने पत्रकारहरूमाथि अनावश्यक निगरानी, मानसिक दबाव तथा व्यक्तिगत प्रतिशोधपूर्ण व्यवहार देखाइरहेको जनाइएको छ ।
विशेषगरी, महासंघका अध्यक्ष रमेश सुवेदीमाथि एसपी तामाङले तस्करीसम्बन्धी समाचारको बदलामा मानसिक प्रताडना दिएको आरोप छ ।
सामान्य उजुरीको आधारमा सुवेदीलाई दुई दिनसम्म अनावश्यक रूपमा मानसिक तनावमा राखिएको र जाहेरीकर्ताको पक्षमा प्रहरी आफैँ वकील झैँ प्रस्तुत भएको महासंघको आरोप पत्रमा उल्लेख छ ।
उक्त घटनाको विरोधस्वरूप बारा जिल्लाका पत्रकारहरूले हालै सम्पन्न ७०औँ प्रहरी दिवस विशेष कार्यक्रममा बहिष्कार गर्दै सांकेतिक विरोध प्रदर्शन गरेका थिए ।
महासंघले प्रहरी प्रमुखको दम्भपूर्ण तथा प्रतिशोधयुक्त कार्यशैलीका कारण प्रहरी–पत्रकार सम्बन्धमा गम्भीर दरार सिर्जना भएको उल्लेख गर्दै पत्रकारको सुरक्षा र स्वतन्त्र पत्रकारिता कायम गर्न सरकार तथा सम्बन्धित निकायलाई तत्काल हस्तक्षेप गर्न माग गरेको छ । 
