काठमाडौं, २६ भदौ । सामाजिक सञ्जाल बन्द र शासकीय अव्यवस्थाविरुद्ध भइरहेको जेनजी आन्दोलनमा मृत्यु हुनेको संख्या ३४ पुगेका छन् ।
स्वास्थ्य मन्त्रालयका अनुसार देशभरका विभिन्न अस्पतालमा उपचाररत घाइतेमध्ये धेरैको मृत्यु भएसँगै संख्या बढेको हो । मन्त्रालयका प्रवक्ता डा. प्रकाश बुढाथोकीका अनुसार हालसम्म १,३६८ जना घाइते अस्पताल पुगेका छन् ।
तीमध्ये ३२१ जना अझै उपचाररत छन् भने ९४९ जना डिस्चार्ज भइसकेका छन् ।
सबैभन्दा बढी मृत्यु काठमाडौंका सिभिल अस्पतालमा ६ र राष्ट्रिय ट्रमा सेन्टरमा ८ जनाको भएको छ । भेरी अस्पतालमा ५, एभरेष्ट र फ्रन्टलाइन अस्पतालमा ३–३, केएमसी र बीपी कोइराला स्वास्थ्य विज्ञान प्रतिष्ठानमा २–२, बयोधा अस्पतालमा २ र त्रिवि शिक्षण अस्पताल, इलाम अस्पताल र बिएनसी अस्पतालमा एक–एक जनाको मृत्यु भएको मन्त्रालयले बताए ।
नयाँ बानेश्वरस्थित संसद् भवन अगाडि प्रदर्शनकारी र प्रहरीबीच भएको झडपपछि प्रहरीले गोली प्रहार गरेको थियो । घाइतेलाई प्रदर्शनकारीहरूले विभिन्न अस्पताल पु¥याएका थिए । केहीको बाटैमा र केहीको उपचारका क्रममा मृत्यु भएको जनाइएको छ ।
