काठमाडौं, २५ साउन । शिक्षा विधेयकको प्रतिवेदन लेखनको कार्यमो कारणले मिडिया काउन्सिल विधेयकमाथिको छलफल प्रभावित बनेका छन् ।
शिक्षा, स्वास्थ्य तथा सूचना प्रविधि समिति विद्यालय शिक्षा विधेयकको प्रतिवेदन लेखन कार्यमा छ । यही काममा समिति सचिवालय र कर्मचारीहरू व्यस्त छन् । सांसदहरू पनि विद्यालय शिक्षा विधेयकको प्रतिवेदन लेखनमा छन् । यसकारण मिडिया काउन्सिल विधेयकमाथि दफावार छलफल सुरु हुन बाकी रहेको छ ।
यही साउन १६ गते शिक्षा, स्वास्थ्य तथा सूचना प्रविधि समिति विद्यालय शिक्षा समितिले मिडिया काउन्सिल विधेयकमाथि दफावार छलफल गर्न संसदीय उपसमिति गठन गरेको थियो । नेकपा एमालेकी सांसद दीपा शर्माको संयोजकत्वमा गठित सात सदस्यीय उपसमितिले मिडिया काउन्सिल विधेयकमाथि छलफल सुरु गरेको छैन ।
‘शिक्षा विधेयकको प्रतिवेदन लेखनमा सबै व्यस्त भएकाले मिडिया काउनिसल विधेयकमाथि छलफल गर्न पाइएको छैन’, संयोजक शर्माले अनलाइनखबरसँग भनिन् । उपसमितिलाई काम सुरु गरेको १५ दिनभित्र प्रतिवेदन समितिसमक्ष पेस गर्न समय दिइएको छ । समिति गठन भएको ९ दिन सम्म पनि उपसमितिमा विधेयकमाथि छलफल सुरु हुन पाईन ।
मिडिया काउन्सिल विधेयकमाथि छलफल गर्न गठित उपसमितिमा सांसदहरू ज्ञानु बस्नेत सुवेदी, डा. तोसिमा कार्की, विनिताकुमारी सिंह, महेन्द्रकुमार राय, प्रभु हजारा र लीलादेवी लिम्बु सदस्य रहेको छ । काम सुरु गरेको १५ दिनभित्र प्रतिवेदन समितिसमक्ष पेस गर्न भनिएकाले काम सुरु गरेपछि धेरै समय नलगाएर मिडिया काउन्सिल विधेयकको प्रतिवेदन तयार पारिने संयोजक शर्माले बताएको छ ।
सञ्चार तथा सूचना प्रविधि मन्त्रालयले ल्याएको प्रस्तावित विधेयक राष्ट्रिय सभाबाट पारित भएर प्रतिनिधि सभामा आएको विधेयक हो । यो विधेयकमा सञ्चार क्षेत्रमा हुने लगानीको स्रोत खोजिने लगायतका प्रावधान छ । प्रस्तावित विधेयकको १८ मा यस सम्बन्धी व्यवस्था छ ।
