मोरङ, २५ असार । मोरङको रतुवामाई नगरपालिका–६ मा ६० वर्षीया टिकामाया कार्की बस्नेतको हत्या भएको छ ।
प्रहरीले हत्याको आरोपमा टिकामायाका देवर ६९ वर्षीय टंकबहादुर बस्नेतलाई पक्राउ गरेको हो । गत असार २१ गते दिउँसो करिब ४ बजे टिकामाया आफ्नै बारीमा मृत अवस्थामा फेला परेको सूचना प्रहरीलाई प्राप्त भएको जिल्ला प्रहरी कार्यालय मोरङले जारी गरेको प्रेस विज्ञप्तिम्ँ उल्लेख गरिएको छ ।
इलाका प्रहरी कार्यालय सिजुवाबाट प्रहरी निरीक्षकको कमान्डमा खटिएको टोली र कोशी अस्पतालबाट फरेन्सिक डाक्टरसहितको टोलीले घटनास्थलमा पुगेर शव जाँच गर्दा मृतकको टाउकोको पछाडि, घाँटी नजिकको दायाँ भागमा भित्री चोट लागेर मृत्यु भएको खुलेको थियो ।
थप अनुसन्धान गर्दै जाँदा टिकामायालाई उनकै देवर टंकबहादुर बस्नेतले दाजुभाइबिच चलेको अंशसम्बन्धी मुद्दामा उच्च अदालतबाट फैसला भइसकेको विषयलाई लिएर रिसिइबी र झगडाका कारण हत्या गरेको खुलासा भएको थियो ।
टंकबहादुरले हँसियाको बिँडले टिकामायाको टाउकोको पछाडि, घाँटी नजिकको दायाँ भागमा प्रहार गरी हत्या गरेको प्रहरीले जनाए । प्रहरीले असार २३ गते टंकबहादुर बस्नेतलाई उनकै घरबाट हत्यामा प्रयोग भएको हँसियासहित नियन्त्रणमा लिएको थियो ।
उनलाई इलाका प्रहरी कार्यालय सिजुवामा ल्याई मोरङ जिल्ला अदालतबाट ज्यानसम्बन्धी कसुर (कर्तव्य ज्यान) मुद्दामा म्याद थप गरी थप अनुसन्धान भइरहेको जिल्ला प्रहरी कार्यालय मोरङका प्रवक्ता तथा सूचना अधिकारी प्रहरी नायब उपरीक्षक कोपिला चुडालले जानकारी दिइन् ।
