मकवानपुर, १६ असार । बागमती प्रदेशसभाको बैठक आज बस्दैछ ।
आज बस्ने बैठकमा आगामी आर्थिक वर्ष २०८२÷०८३ को बजेटमाथि छलफल गर्न दिउँसो १ बजेका लागि बैठक बोलाइएको छ । यसअघि असार १२ गतेका लागि तय गरिएको बैठक सत्ता साझेदार दलका सांसदहरूले नै विरोध गर्ने भएपछि स्थगित गरिएको थियो ।
प्रदेशसभा सचिवालयले सूचना जारी गर्दै बैठक असार १६ गतेका लागि सारिएको जानकारी गराएको थियो । प्रदेशसभा सचिवालयका अनुसार आजको बैठकमा बजेटमाथि छलफल सुरु गरिनेछ ।
बजेटमाथिको छलफलसँगै संशोधन प्रस्तावहरू समेट्दै बैठकहरू निरन्तर सञ्चालन गरिने तयारी सचिवालयले जनाएको छ । मुख्यमन्त्री बहादुर सिंह लामाको नेतृत्वमा रहेको प्रदेश सरकारले प्रस्तुत गरेको ६७ अर्ब ४७ करोड ७३ लाख रुपैयाँको बजेटप्रति सत्तारुढ दलकै सांसदहरूले असन्तुष्टि जनाउँदै आएका छन् ।
नेपाली कांग्रेस र नेकपा एमालेका सांसदहरूले विकास योजनाको वितरण असमान भएको भन्दै आलोचना गरेका हुन् ।
