जनकपुर, १४ असार । जिल्ला धनुषाको बटेश्वर गाउँपालिका–१ स्थित चित्रपुरमा आजबाट दुई दिने आँप मेला सुरु भएको छ ।
स्थानीय स्तरमा उत्पादित भएको आँपको प्रवद्र्धन, व्यवसायिक विस्तार तथा चित्रपुरलाई कृषिपर्यटन गन्तव्यको रूपमा विकास गर्ने उद्देश्यले मेला आयोजना गर्न लागिएको मगही भाषा अभियानी फुलगेन मगहीले बताएका छन ।
चित्रपुर आँप मेला महोत्सव–२०८२’ असार १४ र १५ गते मेला हुने आयोजक चित्रपुर म्याङ्गो एग्रो टुरिज्म बोर्डले जनाएको छ । चित्रपुरका किसानहरूको मुख्य उपज आँप हो, जहाँ करिब ३ सय विघा क्षेत्रफलमा आँपको खेती छ ।
महोत्सवमा विभिन्न प्रकारका आँप, अचार, आमिल, अमोट, जुसलगायत परिकारको प्रदर्शनी तथा विक्री गरिने तयारी भएको मेला संयोजक प्रदीप महतोले जानकारी दिए ।
मेला अवलोकनमा आउने पर्यटकका लागि निःशुल्क आँप स्वाद चखाउने, आँपका बगैंचामा घुमाउने, आँप रुखबाट छानेर टिप्ने अनुभव दिने र विद्यार्थालाई विभिन्न जातका आँप चिनाउने कार्यक्रम पनि समावेश गरिएको छ ।
इच्छुकले भने शुल्क तिरेर रुखमै फलिएका आँप किन्न र घर लैजान सक्नेछन् ।
