काठमाडौँ, ७ असार । नेपाल पत्रकार महासंघले देशका विभिन्न जिल्लामा सञ्चारकर्मीमाथि भइरहेका दुव्र्यवहार, समाचार संकलनमा रोक र सामाजिक सञ्जालमार्फत धम्की दिने कार्यप्रति गम्भीर ध्यानाकर्षण भएको जनाएको छ ।
शनिबार महासंघका महासचिव रामप्रसाद दाहालले जारी गरेको विज्ञप्तिमा यस्ता घटनालाई प्रेस स्वतन्त्रतामाथिको गम्भीर हस्तक्षेपका रूपमा लिँदै दोषीमाथि कडा कानुनी कारबाहीको माग गरेको हो ।
महासंघको गुल्मी शाखाका अनुसार बी टेलिभिजन तथा रेडियो नेपालका पत्रकार सूर्य सुनारमाथि असार ५ गते भिडियो खिच्ने क्रममा मुसिकोट नगरपालिका वडा नं. १, २ र ३ का जनप्रतिनिधिहरू–आनन्द श्रेष्ठ, रविन्द्र केसी र थम्मनबहादुर जिसीले दुव्र्यवहार गरेका थिए ।
नेपाली कांग्रेस र राष्ट्रिय स्वतन्त्र पार्टीले ज्ञापनपत्र बुझाउने कार्यक्रममा समाचार संकलनका लागि पुगेका पत्रकार भावना रिजाल, गणेश दुलाल र मनिल महतोलाई रोकेको थियो ।
