जनकपुरधाम, २१ फागुन । सिराहाको नवराजपुर गाउँपालिका– १ की १७ वर्षीया किशोरी रिंकुकुमारी सदायको सामूहिक बलात्कार र झुन्डिएको अवस्थामा शंकास्पद मृत्युसम्बन्धी घटनाका मुख्य आरोपीलाई प्रहरीले पक्राउ गरेको छ ।
रिंकु सदायको घटनामा मधेश प्रदेश प्रहरी कार्यालयबाट गठन गरिएको पाँच सदस्यीय छानबिन समितिका संयोजकसमेत रहेका वरिष्ठ प्रहरी उपरीक्षक (एसएसपी) शान्तिराज कोइरालाले घटनाका मुख्य आरोपी करिब १८ वर्षीय रुपेश मण्डललाई प्रहरीले पक्राउ गरेको पुष्टि गरेका छन ।
नियन्त्रणमा रहेका मण्डललाई जिल्ला प्रहरी कार्यालय सिराहाले बुधबार अपराह्न पत्रकार सम्मेलनमार्फत सार्वजनिक गरिने उनले बताए । गत माघ २७ गते राति घरबाट तीनजना युवकले अपहरण गरी सामूहिक बलात्कार गरेको घटनालाई आर्थिक लेनदेनमा गाउँमै दबाउन २९ र ३० माघमा दुईपटक जनप्रतिनिधिकै रोहवरमा पञ्चायती गरी पीडित परिवारलाई प्रहरीमा जान नदिएको सार्वजनिक भएको थियो ।
पहिलो दिनको पञ्चायतीले रुपेशलाई एक लाख ५० हजार रुपैयाँ जरिवाना गर्ने निर्णय सुनाएको भोलिपल्ट रकम घटनामा संलग्न तीनजनाले नै तिर्नुपर्ने भन्दै उनका बाबुले दोस्रो दिन फेरि पञ्चायती राखेपछि पञ्चहरूबिच नै कुटाकुट भएको थियो ।
त्यसको एक सातापछि ८ फागुनमा इलाका प्रहरी कार्यालय लहानमा मृतककी आमा सीतादेवी सदायले सामूहिक बलात्कारमा रुपेशसहित तीनजना र पञ्चायत बसेका पाँचजना पञ्च गरी आठजनाविरुद्ध कर्तव्य ज्यान, बलात्कार र अपहरण तथा शरीर बन्धक, पञ्चायतीद्वारा लेनदेन गरी मिलापत्र गर्न खोजेको कसुरमा पूरक जाहेरी दिएकी थिइन् भने पूरक जाहेरीको आधारमा प्रहरीले ११ फागुनमा सोधपुछ तथा अनुसन्धानका लागि नियन्त्रणमा लिइएकामध्ये नवराजपुर– १ भगवतीपुर गाउँका करिब ८४ वर्षीय चन्देश्वर मण्डल, ४५ वर्षीय रामविनोद मण्डल र कमलेशकुमार दासलाई पञ्चायतीद्वारा लेनदेन गरी मिलापत्र गराउन संलग्न रहेको कसुरमा मुद्दा चलाएको थियो ।
