जनकपुरधाम, २ जेठ । धनुषाको क्षिरेश्वरनाथ नगरपालिका ५ महेन्द्रनगरकी बेपत्ता २८ वर्षीया रुवी यादवको हत्या भएको अवस्थामा शव फेला परेको छ ।
जेठ २६ गतेदेखि बेपत्ता उनको शव मिथिला नगरपालिका ६ स्थिति सामुदायिक वनको खोल्सामा फेला परेको छ ।
गत बिहीबार पक्राउ परेका श्रीमान राजु यादवको बयानको आधारमा खोजबिन गर्दा शव शनिबार राति फेला परेको इलाका प्रहरी कार्यालय सखुवा महेन्द्रनगरका इन्सपेक्टर सोन साहले जानकारी दिएका छन । श्रीमान राजुले श्रीमतीको आफूले हत्या गरेको स्वीकारेका छन् ।
जेठ २६ गते बिहानै औरही बाबाको दर्शन गर्न भन्दै रुवीलाई लगेर हत्या गरेको पति राजुले बयान दिएका छन् । श्रीमतीलाई बेपत्ता गरेर हत्या गरेको आशंकामा उनलाई इलाका प्रहरी कार्यालय सखुवा महेन्द्रनगरले गत बिहीबार प्रहरीले पक्राउ गरेको थियो ।
केही महिनाअघि वैदेशिक रोजगारबाट राजु फर्केपछि घरमा बिबाद हुने गरेको भने परस्त्रीसंग राजुको हिमचिम हुँदा बिबाद सुरु भएको थियो ।
रुवीको शव पोस्टमार्टमका लागि प्रादेशिक अस्पताल जनकपुरमा राखिएको छ । रुवीका ६ वर्षीय एक छोरा छन् र घटना विषयमा थप अनुसन्धान गरिरहेको प्रहरीले जनाएको छ ।
