जनकपुर, २९ जेष्ठ । पार्टी विभाजनपछि जनता समाजवादी पार्टी (जसपा) नेपालका अध्यक्ष उपेन्द्र यादवले महन्थ ठाकुर नेतृत्वको लोकतान्त्रिक समाजवादी पार्टी (लोसपा) संग प्रति सहकार्य गर्न तयार भएको छ ।
जनकपुरमा जारी महाधिवेशनमा पेस गरेको ३१ पन्ने प्रतिवेदनमा लोसपासँग सहकार्य गर्न सकिने बाटो खुला राखेका छन् । लोसपाबारे प्रतिवेदनमा लेखिएको छ , ‘समावेशिता, राष्ट्रिय पहिचान र अधिकारकारको पक्षधर लोकतान्त्रिक पार्टी हो । यो पार्टीसँग हाम्रा केही एजेन्डाहरू मिल्छन् ।
तर, यो पार्टी देश र जनताको हितमा आफ्नो निर्णय आफैँ लिन सक्दैन, अर्काको मुख ताक्ने गर्दछ । तर पनि यो पार्टीसँग सहकार्य गर्न सकिन्छ ।’ प्रतिवेदनमा उपेन्द्रले कांग्रेस, एमाले, माओवादी केन्द्र, राप्रपा र लोसपाबारे छुट्टाछुट्टै विश्लेषण गरेका छन् ।
यीबाहेक राष्ट्रिय स्वतन्त्र पार्टी, नागरिक उन्मुक्ति पार्टी, नेकपा एकीकृत समाजवादी, नेकपा मसाल, नेकपा (विप्लव), नेमकिपा, मालेको बारेमा समेत सामूहिक रूपमा व्याख्या गरेका छन् ।
प्रतिवेदनमा लेखिएको छ , ‘कम्युनिष्ट घेराभित्रै नेकपा एकीकृत समाजवादी, नेकपा मसाल, नेकपा (विप्लव), नेमकिपा, माले आदि । यी दलहरू वा त शास्त्रीय साम्यवादको धङधङीबाट ग्रस्त छन् त नेकपा एमालेकै उपग्रही विचार बोक्छन् ।
राष्ट्रिय स्वतन्त्र पार्टी, नागरिक उन्मुक्ति पार्टी जस्ता नयाँ दलहरूले विकास, सुशासन, समृद्धि र सुसंस्कृत राजनीति नभएको चिन्ता व्यक्त गर्दैछन् ।
यो सकारात्मक कुरा नै हो, तर यी दलका विचार के हो र के कस्ता एजेन्डा बोक्ने हुन्, त्यो प्रस्ट छैन । रास्वपा र नाउपा केही नयाँ गरौँ भन्ने हुटहुटीले बनेको हुनसक्ने भए पनि यिनीहरूलाई धैर्यतापूर्वक बुझ्ने, पर्खने गर्नुपर्ने उल्लेख गरेका छन् ।
