जनकपुरधाम, ९ जेठ । नागरिकता दुरुपयोग कसुरमा पक्राउ परेका कान्तिपुर मिडिया ग्रुपका सञ्चालक कैलाश सिरोहियाविरुद्ध जाहेरी दिने व्यक्ति रास्वपाका कार्यकर्ता रहेको देखिएको छ ।
सिरोहियाविरुद्ध जिल्ला प्रहरी कार्यालय धनुषामा सर्लाहीका इन्द्रजित महतोले जाहेरी दिएका छन् । वैशाख १६ मा जाहेरी दिने व्यक्ति रवि लामिछाने नेतृत्वको राष्ट्रिय स्वतन्त्र पार्टी (रास्वपा)का मधेश प्रदेश सदस्य रहेका छन् ।
सर्लाहीको हरिवन नगरपालिका हरिवनका महतो सिरोहियाले फरक–फरक नम्बरका नागरिकताहरु प्रयोग गरिरहेको भन्दै नागरिकता ऐन, २०६३ अनुसारको कसूरमा छानबिन गर्न माग गरेका थिए ।
रास्वपा मधेश प्रदेशका महामन्त्री मनिष साहले हस्ताक्षर गरेको पत्रमा उक्त जानकारी दिइएको छ । सर्लाहीका महतोले २०७९ को प्रतिनिधि तथा प्रदेशसभा चुनावा सर्लाही क्षेत्र नं. ३ (क) बाट स्वतन्त्र (लौरो छाप)बाट प्रदेशसभा सदस्यमा उम्मेदवार बनेका थिए ।
