जनकपुरधाम, १९ पुस । आज जानकी मन्दिरले ११ सय कोसेली (भार) भारत उत्तर प्रदेशको अयोध्यामा नवनिर्मित राम मन्दिरको प्राण प्रतिष्ठामा पठाउँदै छ ।
जनकपुरधामबाट सयौंको संख्यामा भारसहित जनकपुरधामको परिक्रमा गर्दै अयोध्याको लागि प्रस्थान गरिएको छ ।
मिथिलाञ्चलमा छोरीको ससुरालमा घरबास भए माइतबाट कोसेली पठाउने चलन छ ।
त्यही विधि अनुसार अयोध्यामा नवनिर्मित राममन्दिरको प्राण प्रतिष्ठा (घरबास)मा सीताको माइतीघरबाट कोसेली लग्न लागिएको छ ।
कोसेलीमा ठेकुवा, भुसुवा, खाजा, मिठाई, खजुरिया फलफूल, पञ्चमेवा, साडी, धोती ,गरगहना, पलङ, टेबुल, कुर्सी, चुल्होजस्ता सामग्री अयोध्या पुर्याउने कार्यक्रम रहेको छ ।
महोत्तरीको जलेश्वर, मलंगवा, गौर, कलैया हुँदै विरगंजमा रात्री बास बस्ने छ ।
शुक्रबार बिहान सीमापारी रक्सौल हुँदै बेतिया, गोरखपुर र अन्तिममा अयोध्या पुग्ने जानकी मन्दिरका छोटे महन्थ रामरोशन दासले बताए ।
उनका अनुसार शनिबार बिहान ९ बजे राम जन्म भूमि ट्रष्टलाई हस्तान्तरण गर्ने कार्यक्रम रहेको छ ।
त्यसपछि भार लिएर जाने टोलि जनकपुरधाम फर्किने छ ।
