जनकपुरधाम, १४ पुस । संस्कृति, भाषा, संस्कार संरक्षण एवं प्रवद्र्धन गर्ने उद्देश्यले शनिवारदेखि मधेस प्रदेशको राजधानी जनकपुरधाममा सखी बहिनपा मिथिलानी समूहको अन्तर्राष्ट्रिय सम्मेलन शुरु भएको छ ।
नेपाल, भारत विभिन्न भू–भागका तथा बिदेशका सखी बहिनपामा आबद्ध महिलाहरू सहभागी अन्तर्राष्ट्रिय सम्मेलनमा मिथिला र मधेशको भाषा, संस्कार, संस्कृति तथा उद्यमको विकासका विषयमा छलफल तथा संवाद हुने सखी बहिनपा मिथिलानी समूहले जनाएको छ । 
करिब छ सय भन्दा बढि महिलाहरूको सहभागिता रहेको छ । सम्मेलनमा महिलाहरूले घर घरमा उत्पादन गरेको मिथिलाको चित्रकला तथा घरेलु उत्पादनहरूको प्रदर्शन पनि गरेका छन् ।
घर घरमा महिलाहरूले उत्पादन गर्ने गरेको अदौरी, तिलौरी, चनौरी, पापड, पिठौरी, दनौरी, अरिकोच प्रदर्शनमा राखिएको छ ।
सखी बहिनपा मिथिलानी महिला समूहका अध्यक्ष आरती झाको अध्यक्षतामा भएको सो अन्तर्राष्ट्रिय सम्मेलनमा महिला शक्तिकरणका विभिन्न विषयहरूमा कार्यपत्र प्रस्तुत गरेर त्यसमाथि छलफल तथा संवाद गर्ने अध्यक्ष झाले बताए । 
कार्यक्रममा महिला समूहले मिथिला पेन्टिङमा ख्याति कमाउन सफल मिथिलेश्वरी कर्ण, गायिका शान्ति सदा तथा साहित्यकार हिमांशु चौधरीलाई दोसल्लासहित सम्मान पत्रद्वारा सम्मान गरेको छ । 
