जनकपुरधाम,२९ बैशाख । धनुषाको सबैला नगरपालिका–९ कोल्हुवामोड घर भई लामो समयदेखि सिरहामा बस्दै आएका एक साधुको मृत्युपछि शिष्यले पनि प्राण त्यागेका हो ।
साधुको दाहसंस्कार भइरहँदा त्यही चितामा हाम फालेर उनले आत्मदाह गरेका छन् । सुखीपुर नगरपालिका–२ छजनास्थित हनुमान मन्दिरमा १२२ वर्षीय साधु विष्णु दासको सोमबार निधन भएको थियो ।
बरियारपट्टीको क्याम्पस निर्माणार्थ भएको विष्णु महायज्ञमा सहभागी हुन पुगेका उनी केही दिनदेखि छजनाको हनुमान मन्दिरमा आश्रय लिएर बसेका थिए ।
साधु दासको दाहसंस्कार भइरहेकै बेला भारतीय गाउँ लक्ष्मीनियाँकै ५५ वर्षीय रामचन्द्र महतोले चितामै हामफालेर आत्मदाह गरेका छन् । स्थानीयका अनुसार महतो साधु दासको चेला हुन् । उनी लामो समयदेखि साधुसँगै बस्दै आएका थिए ।
उनी अचानक चितामा हामफाले,’ स्थानीय एक मलामीले भने, सबैले उनको खुट्टा तानेर बचाउने प्रयास गरे । तर दनदनी बलेको आगोबाट महतोलाई तान्न सकिएनन् । उनी पनि बाबाकै चितामा जले ।
गुरुकै चितामा शिष्यले पनि प्राण त्यागेको भिडियो यतिबेला सामाजिक सञ्जालमा समेत भाइरल बनेको छ ।
