जनकपुरधाम, ८ बैशाख । दहेज(दाइजो) नदिएको भन्दै धनुषामा एक युवकले श्रीमतीलाई आगो लगाएर हत्या गर्ने प्रयास गरेको छ ।
जनकपुरधाम उपमहानगरपालिका २० देवपुरा रुपैठाकी २८ वर्षीया श्वेता झाको शरीरमा उनका श्रीमान् राजीव झा र उनको परिवारका अन्य सदस्य मिलेर आगो लगाएर हत्या गर्ने प्रयास गरेको प्रहरीले जनाएको छ ।
घाइते श्वेता अहिले जनकपुरधामस्थित प्रादेशिक अस्पतालमा उपचाररत छिन् । घाइते श्वेताले श्रीमान् राजीव र उनको परिवार मिलेर आफ्नो शरीरमा आगो लगाएको आरोप लगाइन् ।
श्वेताले आफूलाई श्रीमान् राजीव, ससुरा शिवशंकर झा, सासू र देवरलगायतले कुटपिट गर्दै शरीरमा आगो लगाएर ज्यान मार्ने प्रयास गरेको आरोप लगाईन ।
यही वैशाख १ गते राजीवले ९ वर्षीय छोरालाई कुटपिट गरेपछि बचाउने क्रममा आफूलाई पनि राजीवले कुटपिट गर्दै आफ्ना भाइ, बुबा र आमाको सहयोगमा शरीरमा आगो लगाइदिएको श्वेताले आरोप लगाएको छ ।
घटनाबारे थाहा पाएपछि विहारको दरभंगास्थित पोठिया माइती भएकी श्वेताताका बुबा जयकुमार झा, लगायत आफन्त आएर उनलाई प्रादेशिक अस्पताल जनकपुरमा भर्ना गराई रहेका छन ।
श्वेताका अनुसार विवाहका बेला श्रीमान् पक्षले ३ तोला सुन मागेको थियो ।
