काठमाडौं,१४ फागुन । प्रधानमन्त्री पुष्पकमल दाहाल प्रचण्ड कतारको दोहा जाने भएका छन् । उनी अतिकम विकसित मुलुकहरू (एलडिसिज) को पाँचौं सम्मेलनमा सहभागी हुन यही १९ फागुनमा दोहा जान लागेका छन् ।
प्रधानमन्त्री नेतृत्वको नेपाली प्रतिनिधिमण्डल सम्मेलनमा सहभागी हुन फागुन १९ गते जाने र फागुन २२ गते स्वदेश फर्कने कार्यक्रम तय भएको परराष्ट्र मन्त्रालयले जनाएको छ ।
मन्त्रालयका प्रवक्ता सेवा लम्सालका अनुसार सम्मेलनका क्रममा प्रधानमन्त्री प्रचण्ड संयुक्त राष्ट्रसंघका केही कार्यक्रममा पनि सहभागी हुनेछन् । सो अवसरमा उनी साइडलाइन बैठक र द्विपक्षीय बैठकमा सहभागी हुने छन् ।
दोहामा रहँदा प्रधानमन्त्री दाहाल नेपाली दूतावासले आयोजना गर्ने कार्यक्रम र नेपाली समुदायसँगको कार्यक्रममा पनि सहभागी हुने छन् ।
एलडिसिजको पाँचौँ सम्मेलनका क्रममा विषयगत आठ गोलमेच बैठक हुने र त्यसमध्ये तीन बैठकमा नेपाली प्रतिनिधिमण्डलले सहभागिता जनाउने छ ।
