जनकपुरधाम,१२ फागुन । पर्यावरण अभियन्ता दिलीप महतोको हत्यामा संलग्न रहेको दोषी ठहरिएका मुख्य अभियुक्त दुई जनालाई जिल्ला अदालत धनुषाले २५ वर्ष कैदको फैसला सुनाईएको छ ।
अवैध उत्खनन रोक्न खोज्दा हत्या गरिएका दिलीपको मुद्दामा दोषी ठहरिएका मुख्य अभियुक्त विपिनकुमार महतो र मुनिन्द्र महतोलाई २५ वर्ष कैद र पाँच पाँच लाख रुपैयाँ क्षतिपूर्ति भराउने फैसला सुनाएको छ ।
त्यस्तै घटनामा मतियारको भूमिका निर्वाह गरेका जितेन्द्र महतोको हकमा १२ वर्ष कैद र पीडित परिवारलाई २ लाख ५० हजार रुपैयाँ क्षतिपूर्ति तिराउने फैसला भएको धनुषा जिल्ला अदालतका श्रेस्तेदार विकास बस्नेतले जानकारी दिनुभएको छ ।
यसअघि धनुषा जिल्ला अदालतका न्यायाधीश चित्रबहादुर गुरुङको एकल इजलासले गत बुधबार मुद्दाको फैसला गर्दै उनीहरूलाई दोषी ठहर गरिएको थियो ।
विपिन र मुनिन्द्रले दिलीपको नियतपूर्वक हत्या गरेकाले उनीहरूलाई मुख्य कसुरदार ठहर गरिएको थियो । त्यस्तै, जितेन्द्रलाई मतियारका रुपमा कसुरदार ठहर गरिएको थियो ।
हत्याको आरोप लागेका अन्य चारजनालाई भने जिल्ला अदालतले सफाइ दिइसकेको छ ।
