काठमाडौं, १२ भदौं । नक्कली भुटानी शरणार्थी प्रकरणलगायत सबै घटनामा राज्यले निष्पक्षरूपले छानबिन गरिरहेको प्रधानमन्त्री पुष्पकमल दाहाल प्रचण्डले बताएका छन् ।
मंगलबार प्रतिनिधिसभा बैठकमा सांसदहरूसँग प्रत्यक्ष प्रश्नोत्तर कार्यक्रममा सांसद असीम साहको जवाफ दिँदै प्रधानमन्त्री दाहालले सबै घटनामा दबाबरहित र निष्पक्षरूपमा छानबिन भइरहेको बताएका छन् ।
उनले आफूले सरकारको नेतृत्व गरेसँग सार्वजनिक प्रशासनलाई स्वच्छ, सक्षम, निष्पक्ष, पारदर्शी, व्यावसायिक र जवाफदेही बनाएको बताएका छन ।
मेरो नेतृत्वमा सरकार गठन भएदेखि आजका दिनसम्म मैले सामाजिक न्यायको प्रत्याभूति सुशासनको सुनिश्चितता र सार्वजनिक सेवा प्रवाहमा सुधारलाई मुख्य प्राथमिकतामा राख्दै आएको छु ।
प्रश्नमा भनिएजस्तो सरकारका यी कामहरू कुर्सी टिकाउनका लागि होइनन् बरु देश र जनतामा राजनीतिक प्रणालीप्रति नै वितृष्णा छाएको, केही हुन्न सबै उस्तै हुन् भन्ने निराशावादी भाष्य निर्माण गर्न खोजिएको परिस्थितिलाई चिर्न सरकारले एकपछि अर्को राम्रो काम गर्दै आइरहेको छ,’ प्रधानमन्त्री दाहालले भने ।
उनले भ्रष्टाचारलाई कडाइका साथ नियन्त्रण गर्न सरकारले विभिन्न नीतिगत, कानुनी तथा संस्थागत सुधारलाई अघि बढाएको पनि बताए ।
