जनकपुरधाम, ५ भदौ । महोत्तरीमा सवारी दुर्घटनामा बुबाछोरीको मृत्यु भएको छ ।
बर्दिबास नगरपालिका– २ मा पर्ने बर्दिबास औरही सडक खण्डमा सोमबार साँझ स्कुल बस र मोटरसाइकल आपसमा ठोक्किँदा बाबु छोरीको मृत्यु भएको थियो ।
मृत्यु हुनेमा बर्दिबास– ८ हात्तीलेटका ५५ वर्षीय उपेन्द्र महतो र उनकी २२ वर्षीया छोरी रविना रहेकी छन् । दुर्घटनामा गम्भीर घाइते भएपछि छोरीलाई उपचारको लागि बर्दिबासस्थित ट्रमा सेन्टरमा पुर्याइएको थियो ।
उपचारको क्रममा गए राति उनको मृत्यु भएको जिल्ला प्रहरी कार्यालय महोत्तरीका सूचना अधिकारी प्रहरी नायव उपरीक्षक दिलिप गिरीले जनाएको छ ।
बुवा उपेन्द्रको जनकपुरस्थित प्रादेशिक अस्पतालमा मंगलबार बिहान मृत्यु भएको डिएसपी गिरीले जानकारी दिनुभएको छ । दुर्घटनापछि प्रहरीले ना १ क ९७८९ नम्बरको बस र त्यसका चालक बर्दिबास– ४ का निरपराज नेपाललाई नियन्त्रणमा राखेको छ ।
