जनकपुरधाम, २० असार । महोत्तरीको सम्सी गाउँपालिकाका लेखापाल रोशन कुमार राउतले १ लाख २५ हजार घुस रकम सहित पक्राउ परेका हुन ।
सम्सी गाउँपालिका वडा नं. ५ मा संचालन भएको कोभिड–१९ सम्बन्धी जनचेतनामूलक कार्यक्रम सम्पन्न पश्चात उक्त कार्यक्रमको भुक्तानी दिने प्रयोजनार्थ सेवाग्राहीसँग घुस माग गरिरहेको भन्ने सूचना एवं उजुरी निवेदनका आधारमा अख्तियार दुरुपयोग अनुसन्धान आयोगको कार्यालय बर्दिवासबाट खटिएका टोलीले राउतलाई पक्राउ गरेको छ ।
राउत र कार्यालय सहयोगी घरिन यादवलाई सेवाग्राहीबाट एक लाख पच्चीस हजार रुपैयाँ घुस लिइसकेको अवस्थामा उक्त रकमसहित सम्सी गाउँपालिकाको कार्यालयबाट बुधबार नियन्त्रणमा लिई थप अनुसन्धान भइरहेको अख्तियारका टोलीले जनाएको छ ।
