काठमाडौं, १३ कात्तिक । अनामनगरस्थित दियो पोस्ट अनलाइनको कार्यालयमा सादा पोशाकका प्रहरी पुगेका छन्।
कार्यालयमा चार जना प्रहरी पुगेर प्रधानसम्पादक सुदीप विश्वकर्मा र समाचार संयोजक मदन ढुंगानासँग कुराकानी गर्नुपर्ने भन्दै खोजी गरेको एक पत्रकारले जानकारी दिएका छन् । कार्यालय पुगेका प्रहरीले दुवै पत्रकारलाई भेट्नुपर्ने भन्दै आफूहरू आएको बताएका थिए।
यसअघि दियो पोस्टले प्रधानन्यायाधीश सम्बन्धी समाचारको विषयलाई लिएर धम्की आएको समाचार प्रकाशित गरेको थियो।
यसैबीच, नेपाल प्रेसका पत्रकार विश्वमणि सुवेदीलाई प्रहरीले नियन्त्रणमा लिइसकेको छ भने नयाँ पत्रिकाको कार्यालयमा पनि सादा पोशाकका प्रहरी पुगेर पत्रकार नवराज मैनालीबारे सोधखोज गरेका छन्।
एकपछि अर्को सञ्चारमाध्यमका कार्यालयमा प्रहरी पुग्न थालेपछि पत्रकारिता क्षेत्रको सुरक्षा र प्रेस स्वतन्त्रतामाथि प्रश्न उठ्न थालेको छ।
