जनकपुरधाम, १० जेठ । धनुषाको क्षीरेश्वरनाथ नगरपालिकामा कार्यरत करारका कर्मचारीहरु बुधबारदेखि धर्नामा बसेको छ ।
नगरपालिकाले २०७४ सालपछि नियुक्त भएका करारका कर्मचारीहरुको म्याद थप निर्णय नगरेपछि उनीहरु धर्नामा बसेका छन् । विगत ६ वर्षदेखि कार्यरत करारका कर्मचारी जमिल अख्तरले राजनीतिक पूर्वाग्राही रुपमा आफूहरुसंग विभेद भएको बताउनुभएको छ ।
पालिकाले करारका कर्मचारीलाई करार अवधि नथपेपछि आफूहरु बाध्य भएर धर्नामा बसेको अख्तरले बताएका छन । उनले नगर प्रमुख सुखदेव यादव र प्रमुख प्रशासकिय अधिकृत मिलेर कर्मचारीहरुलाई विनाकारण हटाइएकोले ध्यानाकर्षण गराउँदै माग पूरा नभएसम्म धर्ना यथावत राख्ने बताएका छन ।
बुधबार पहिलो दिन कर्मचारीहरु बिहान १० देखि ३ बजेसम्म धर्नामा बसेका थिए । बिहीबार भने बिहान १० देखि ४ बजेसम्म धर्नामा बस्ने अख्तरले जानकारी दिएका छन । 
करार कर्मचारीहरुको नियुक्ति खारेज वा म्याद नथपिएका कर्मचारीको म्याद थप गर्नुपर्ने मागसहित कर्मचारीहरुले धर्ना सुरु गरेका छन् । अख्तरले सो पालिकामा कार्यरत करारका कर्मचारीले विगत ११ महिनादेखि तलबबाट समेत बञ्चित रहेको बताए ।
यसअघि सोमबार करारका कर्मचारी एवम् ज्येष्ठ नागरिकहरुले नगरपालिकाको कार्यालयमा तालाबन्दी गरेका थिए ।
