काठमाडौं,२१ च्ैत्र । आउँने १० वैशाखमा हुने प्रतिनिधिसभा सदस्यको उपनिर्वाचनका उम्मेदवारविरुद्ध कुनै उजुरी भए आज दर्ता गर्न सकिनेछ ।
निर्वाचन कार्यतालिकाअनुसार उम्मेदवारविरुद्ध उजुरी दिनका लागि निर्वाचन आयोगले आजको दिन तोकेको छ । तनहुँ १, बारा २ र चितवन २ मा हुने उपनिर्वाचनका लागि सोमबार उम्मेदवारी दर्ता भएको थियो ।
ती उम्मेदवारविरुद्ध उजुरी परेमा २२ चैतमा छानबिन गरी सोही दिन साँझ उम्मेदवारको नामावली प्रकाशन गर्ने निर्वाचन कार्यतालिका छ ।
उम्मेदवारी फिर्ता लिन इच्छुकका लागि २३ चैतमा बिहान ९ बजेदेखि दिउँसो १ बजेसम्मको समय तोकिएको छ । उम्मेदवारको अन्तिम नामावली प्रकाशन र चुनाव चिह्न पनि सोही दिन प्रदान गरिनेछ ।
त्यसपछि चुनाव प्रचार प्रसार सुरु हुने र १० वैशाखको बिहान ७ बजेदेखि साँझ ५ बजेसम्म उपनिर्वाचनका लागि मतदान हुने निर्वाचन तालिकामा उल्लेख गरिएको छ ।
