जनकपुर, १ असोज । जनकपुरको रामचोकस्थित गणेश मन्दिरमा दर्शन गर्न पुगेका एक बालकको खुट्टाबाट चाँदीको बाला चोरी भएको छ ।
बुधबार साँझ करिब ७ बजे मन्दिरमा दर्शन गर्न पुगेका रामानन्दचोक निवासी परिवारका बालकको खुट्टाबाट अज्ञात व्यक्तिले चाँदीको बाला निकालेर लगेको परिवारले जनाएको छ । परिवारका अनुसार बालकसहित सबै सदस्य मन्दिरमा दर्शन गर्न पुगेका थिए ।
दर्शन तथा भीडभाडका क्रममा बालकको खुट्टामा लगाइएको चाँदीको बाला चोरी भएको थाहा भएको हो । चोरी भएको बालाको मूल्य करिब २८ हजार रुपैयाँ रहेको बताइएको छ । घटनापछि मन्दिर परिसरमा जडान गरिएको सीसीटीभी क्यामेरामाथि पनि प्रश्न उठेको छ । मन्दिरमा सीसीटीभी क्यामेरा जडान गरिएको भए पनि घटना भएको समयमा क्यामेरा सञ्चालनमा नरहेको परिवारको भनाइ छ ।
क्यामेरा सञ्चालनमा रहेको भए चोरीमा संलग्न व्यक्तिको पहिचान गर्न सहयोग पुग्न सक्ने उनीहरूले बताए । दर्शन तथा पूजाका लागि आउने भक्तजनको सुरक्षाका लागि मन्दिर परिसरमा पर्याप्त सुरक्षा व्यवस्था हुनुपर्ने भए पनि चोरीको घटना हुनुले व्यवस्थापन पक्षप्रति प्रश्न उठेको छ ।
विशेषगरी भीडभाड हुने समयमा बालबालिका, महिला तथा वृद्धवृद्धाको सुरक्षामा थप ध्यान दिनुपर्ने स्थानीयको भनाइ छ । घटनाबारे पीडित परिवारले जिल्ला प्रहरी कार्यालय धनुषामा उजुरी दिइसकेको जनाएको छ । प्रहरीले घटनाबारे आवश्यक अनुसन्धान गरी चोरीमा संलग्न व्यक्तिको पहिचान तथा खोजी गर्ने जनाएको छ ।
मन्दिरमा नियमित रूपमा भक्तजनको आवतजावत हुने भएकाले सुरक्षा व्यवस्थालाई प्रभावकारी बनाउन सीसीटीभी क्यामेरा नियमित सञ्चालनमा राख्नुका साथै आवश्यक निगरानी बढाउनुपर्ने देखिएको छ।
