जनकपुर, २८ कात्तिक । राष्ट्रिय स्वतन्त्र पार्टी (रास्वपा) का सभापति रवि लामिछानेले पार्टी र सरकारबीच कुनै मतभेद वा विवाद नरहेको स्पष्ट पारेका छन्।
शनिबार जनकपुरमा आयोजित शुभकामना आदानप्रदान कार्यक्रममा बोल्दै लामिछानेले सरकारलाई दिइने सुझाव र आलोचनालाई पार्टीभित्रको विवादका रूपमा प्रचार गरिएको भन्दै त्यसमा विश्वास नगर्न आग्रह गरे। उनले आलोचना र सुझावलाई बलियो आन्तरिक लोकतन्त्रको अभ्यासका रूपमा लिनुपर्ने बताए।
यसैगरी, जनताले रास्वपालाई दिएको अवसरबाट मधेशमा परिवर्तनको अनुभूति गराउन नसके आगामी निर्वाचनमा भोट माग्न नआउने उनले बताए। जनताको आशा र विश्वासलाई धोका नदिन नेता तथा कार्यकर्तालाई आग्रह गर्दै उनले परिणाममुखी काम गर्न निर्देशन दिए।
