काठमाडौं, २४ कार्तिक । प्रधानमन्त्री बालेन्द्र शाहले चाडपर्वले आपसी मनमुटाव र रिसराग बिर्सेर समाजमा एकता, सद्भाव तथा सहिष्णुताको भावना बढाउनुपर्ने बताएका छन्।
नेपाल संवत् ११४७ तथा म्हः पूजाको अवसरमा शुभकामना सन्देश जारी गर्दै प्रधानमन्त्री शाहले नेपाल संवत् नेपालको मौलिक पहिचान र ऐतिहासिक समयचक्र भएको उल्लेख गरेका छन्। राष्ट्रिय विभूति शङ्खधर साख्वाःले जनतालाई ऋणमुक्त गराएर यसको सुरुवात गरेको उनले स्मरण गरेका छन्।
उनले नेवार समुदायको मौलिक पर्व म्हः पूजाले आत्मशुद्धि, आत्मसम्मान र सांस्कृतिक पहिचानको सन्देश दिने बताएका छन्। यस्ता परम्पराले सामाजिक एकता र पुर्ख्यौली संस्कृतिको संरक्षणमा योगदान पुर्याउने उनको भनाइ छ।
त्यसैगरी गोवर्धन पूजा र हली तिहारको धार्मिक तथा सांस्कृतिक महत्त्व उल्लेख गर्दै उनले कृषि कार्यमा सहयोग गर्ने गोरु र कृषि औजारको सम्मान गर्ने परम्परा नेपाली संस्कृतिको महत्त्वपूर्ण पक्ष भएको बताएका छन्।
देउसी–भैलोले छरछिमेकमा आत्मीयता र सद्भाव बढाउने उल्लेख गर्दै प्रधानमन्त्री शाहले चाडपर्वले सबैको जीवनमा सुख, शान्ति, समृद्धि र प्रगति ल्याओस् भन्ने कामना गरेका छन्।
