जनकपुर, २३ कार्तिक । धनुषाको बटेश्वर गाउँपालिका–५ कालिपुरमा श्री श्री १०८ श्री काली माई पूजा महोत्सव २०८३ को अवसरमा भव्य कलश यात्रा सम्पन्न भएको छ। काली माई पूजा समिति परिवार, कालिपुरको आयोजनामा सोमबार धार्मिक विधि र परम्पराअनुसार कलश यात्रा निकालिएको हो।
धार्मिक तथा सांस्कृतिक महत्व बोकेको उक्त कलश यात्रामा स्थानीय जनप्रतिनिधि, राजनीतिक व्यक्तित्व, श्रद्धालु भक्तजन, युवा तथा सर्वसाधारणको उल्लेख्य सहभागिता रहेको थियो। यात्रामा बटेश्वर गाउँपालिका–५ का वडा अध्यक्ष शिवकरण यादव, गाउँपालिका अध्यक्षका प्रत्यासी अजय राउतसहित स्थानीयवासीहरूको उपस्थिति रहेको थियो।
काली माईप्रतिको श्रद्धा, आस्था र विश्वासलाई प्रकट गर्ने उद्देश्यले आयोजना गरिएको कलश यात्राले कालिपुर क्षेत्रको वातावरण भक्तिमय र उल्लासमय बनेको थियो। धार्मिक उत्साहका साथ सहभागी भएका श्रद्धालुहरूले कलश यात्रा सफल बनाउन सक्रिय सहभागिता जनाएका थिए।
आयोजकका अनुसार पूजा महोत्सवको मुख्य उद्देश्य स्थानीय धार्मिक आस्था, परम्परा र संस्कृतिको संरक्षण तथा प्रवर्द्धन गर्नुका साथै समुदायबीच आपसी सद्भाव, एकता र भाइचाराको भावना अभिवृद्धि गर्नु रहेको छ।
स्थानीय समुदायको सामूहिक सहभागितामा आयोजना हुने यस्ता धार्मिक तथा सांस्कृतिक कार्यक्रमले पुस्तौँदेखि चलिआएका मौलिक परम्परालाई निरन्तरता दिन महत्वपूर्ण भूमिका खेल्ने विश्वास गरिएको छ।
