काठमाडौं, २१ कात्तिक । सरकार र अनशनरत डा. गोविन्द केसीबीच ६ बुँदे सहमति भएपछि उनको २५औँ सत्याग्रह अन्त्य भएको छ।
शिक्षा तथा खेलकुदमन्त्री सस्मित पोखरेल शनिबार राति त्रिवि शिक्षण अस्पताल पुगेर डा. केसीसँग सहमति गरेका हुन्। सहमतिपछि मन्त्री पोखरेलले केसीलाई जुस खुवाएर अनशन तोडाएका थिए। उनले अब डा. केसीले पुनः अनशन बस्नुपर्ने अवस्था नआउने विश्वास व्यक्त गरे।
सहमति पत्रमा डा. केसी, मन्त्री पोखरेल, प्रधानमन्त्रीका स्वास्थ्य सल्लाहकार प्रा. डा. जगदीश अग्रवाल, सांसद पुकार बम र नेपाल मेडिकल एसोसिएसनका अध्यक्ष डा. बद्री रिजालले हस्ताक्षर गरेका छन्।
सहमतिअनुसार सहिद दशरथ चन्द स्वास्थ्य विज्ञान विश्वविद्यालय र नेपाली सेना स्वास्थ्य विज्ञान प्रतिष्ठानलाई एमबीबीएस कार्यक्रम सञ्चालन तथा सिट थप गर्न दिइएको अनुमतिमा मापदण्ड पालना भए–नभएको छानबिन गर्न प्रा. रमेशप्रसाद आचार्यको संयोजकत्वमा पाँच सदस्यीय समिति गठन गरिनेछ।
समितिको प्रतिवेदन प्राप्त भएपछि साझा प्रवेश परीक्षा उत्तीर्ण विद्यार्थीको म्याचिङ प्रक्रिया अघि बढाइनेछ। छानबिनमा मापदण्ड उल्लंघन वा स्वार्थको द्वन्द्व देखिए सम्बन्धित पदाधिकारी तथा व्यक्तिमाथि कारबाही गरिने सहमतिमा उल्लेख छ।
