विराटनगर, २१ कात्तिक । सुनसरीको धरानमा प्रहरीले विस्फोटक पदार्थ बनाउन प्रयोग हुने ४७ किलो सामग्री बरामद गरेको छ। भन्सार छली ल्याइएका सामानसँगै मिनी ट्रकमा लुकाएर राखिएको अवस्थामा उक्त सामग्री फेला परेको हो।
इटहरीबाट धरानतर्फ जाँदै गरेको को १ प्र.०२–००२ ख १६१८ नम्बरको मिनी ट्रक जाँच गर्ने क्रममा प्रहरीले बोरामा प्याक गरिएको सेतो ठोस पदार्थ बरामद गरेको थियो।
घटनामा संलग्न रहेको आरोपमा मोरङका २५ वर्षीय प्रदीपकुमार साह, ४२ वर्षीय भूपेन्द्र राजवंशी र ४२ वर्षीय कार्तिक राजवंशीलाई प्रहरीले नियन्त्रणमा लिएको छ।
प्रहरीको केन्द्रीय विधिविज्ञान प्रयोगशालाले परीक्षण गर्दा उक्त पदार्थ गन पाउडर र ब्ल्याक पाउडर बनाउन प्रयोग हुने सामग्री रहेको पुष्टि गरेको छ।
प्रहरीका अनुसार पक्राउ परेकाहरूमाथि अभद्र व्यवहार र विस्फोटक पदार्थसम्बन्धी कसुरमा अनुसन्धान भइरहेको छ। बरामद सामग्रीको स्रोत र प्रयोगबारे थप अनुसन्धान जारी रहेको प्रहरीले जनाएको छ।
