काठमाडौं, १४ कात्तिक । नेपाली कांग्रेसले आइतबार दिउँसो २ बजेका लागि केन्द्रीय कार्यसमिति बैठक आह्वान गरेको छ।
महामन्त्री उदयशमशेर राणाका अनुसार बैठकमा सञ्चारगृहमा प्रहरी प्रवेश गरी पत्रकार पक्राउ गरिएको घटना, पार्टीभित्रको कार्यविभाजन तथा पूर्वसभापति शेरबहादुर देउवा पक्षले गर्न लागेको समानान्तर महाधिवेशनबारे छलफल हुनेछ।
समाचार संकलन र प्रकाशनका क्रममा प्रहरीले सञ्चारगृहमा प्रवेश गरेर पत्रकारलाई नियन्त्रणमा लिएको घटनाको कांग्रेसले यसअघि नै विरोध जनाइसकेको छ। उक्त विषयमा बैठकबाट पार्टीको आधिकारिक धारणा तय गर्ने तयारी छ।
त्यस्तै, १५औँ महाधिवेशनबाट निर्वाचित पदाधिकारी तथा केन्द्रीय सदस्यहरूको जिम्मेवारी बाँडफाँटबारे पनि छलफल हुने बताइएको छ। देउवा पक्षले मंसिर २१ देखि २३ गतेसम्म महाधिवेशन लक्षित मातहतका अधिवेशन अघि बढाइरहेको विषयले पनि बैठकमा प्राथमिकता पाउने जनाइएको छ।
