काठमाडौं, १२ कात्तिक । चक्रवाती आँधी ‘अर्नब’को सम्भावित प्रभावलाई ध्यानमा राख्दै नेपाल नागरिक उड्डयन प्राधिकरणले हवाई सुरक्षा सतर्कता अपनाउन सम्बन्धित निकायलाई निर्देशन दिएको छ।
प्राधिकरणले सुरक्षा परिपत्र जारी गर्दै वायुसेवा कम्पनी, विमानस्थल सञ्चालक तथा हवाई ट्राफिक व्यवस्थापनमा संलग्न निकायलाई आवश्यक तयारी गर्न आग्रह गरेको हो।
मौसम प्रतिकूल हुँदा देशका विभिन्न क्षेत्रमा भारी वर्षा, चट्याङ, तीव्र हावाहुरी तथा उच्च पहाडी र हिमाली क्षेत्रमा हिमपात हुन सक्ने अनुमान गरिएको छ। बिहीबारदेखि शनिबारसम्म यसले हवाई उडान, अवतरण र विमानस्थल सञ्चालनमा असर पार्न सक्ने प्राधिकरणले जनाएको छ।
प्राधिकरणले मौसमको नियमित मूल्यांकन गर्न, धावनमार्गमा पानी जम्ने तथा चिप्लिने जोखिम जाँच गर्न र उडान चालक दललाई मौसमसम्बन्धी जानकारी समयमै उपलब्ध गराउन निर्देशन दिएको छ। साथै, आवश्यकताअनुसार उडान मार्ग परिवर्तन, होल्डिङ तथा वैकल्पिक विमानस्थल प्रयोगको तयारी गर्न पनि भनिएको छ।
सम्बन्धित सबै निकायलाई सञ्चार प्रणाली, वैकल्पिक विद्युत् आपूर्ति र अन्य अत्यावश्यक उपकरण तयारी अवस्थामा राख्न तथा सम्भावित जोखिमबारे तत्काल जानकारी गराउन प्राधिकरणले आग्रह गरेको छ।
