जनकपुर, ११ कात्तिक । नेकपा एमालेको केन्द्रीय परिपत्रअनुसार धनुषाको विदेह नगरपालिकामा नगर कमिटीद्वारा आयोजित पार्टी जागरण अभियान सम्पन्न भएको छ। अभियानमा पार्टी संगठनलाई थप सुदृढ बनाउने, जनतासँगको सम्बन्ध विस्तार गर्ने, पार्टीका नीति तथा कार्यक्रम जनस्तरसम्म पुर्याउने र आगामी निर्वाचनको तयारीलाई व्यवस्थित बनाउने विषयमा छलफल गरिएको छ।
विदेह नगर कमिटीका अध्यक्ष सत्रुधन रायको अध्यक्षतामा सम्पन्न कार्यक्रममा मधेश प्रदेश सरकारका पूर्वमन्त्री तथा नेकपा एमालेका केन्द्रीय सदस्य लखन दास तत्मा प्रमुख अतिथिका रूपमा सहभागी थिए। कार्यक्रममा पूर्वसंविधानसभा सदस्य फर्मुद नदाफ र विदेह नगरपालिकाका नगरप्रमुख बेचन दास विशिष्ट अतिथिका रूपमा उपस्थित थिए।
त्यसैगरी एमाले जिल्ला कमिटी सदस्य रामभजन दास, श्यामसुन्दर दास, जीवछी देवी, वडाध्यक्षहरू राधेश्याम गोइत, वृजदन मण्डल, जयराम मण्डल, राजकिशोर सिंह, रामपुकार सहनीलगायत पार्टीका नेता तथा कार्यकर्ताको सहभागिता रहेको थियो।
कार्यक्रममा बोल्दै प्रमुख अतिथि लखन दास तत्माले पार्टी संगठनलाई प्रभावकारी बनाउन नेता तथा कार्यकर्ताहरू जनतासँग प्रत्यक्ष जोडिनुपर्नेमा जोड दिए। पार्टीका नीति, विचार र कार्यक्रमलाई जनताको बीचमा पुर्याउँदै जनताका समस्या, आवश्यकता र गुनासालाई प्राथमिकताका साथ सम्बोधन गर्नुपर्ने उनको भनाइ थियो।
पूर्वमन्त्री तत्माले संगठन सुदृढीकरणका लागि पार्टीका नेता तथा कार्यकर्ताबीच आपसी समन्वय, एकता र सक्रियता आवश्यक रहेको उल्लेख गर्दै स्थानीय तहमा पार्टीको उपस्थितिलाई थप प्रभावकारी बनाउनुपर्ने धारणा राखे। उनका अनुसार पार्टीको वास्तविक शक्ति जनतासँगको सम्बन्ध र जनताका सवालमा गरिने कामबाट स्थापित हुन्छ। त्यसैले कार्यकर्ताहरूले संगठन विस्तारसँगै जनताका दैनिक समस्या समाधानका विषयमा समेत ध्यान दिनुपर्नेमा उनले जोड दिए।
आगामी निर्वाचनलाई लक्षित गर्दै उनले पार्टीको संगठनात्मक तयारी समयमै व्यवस्थित गर्नुपर्ने आवश्यकता औँल्याए। निर्वाचनमा प्रभावकारी भूमिका निर्वाह गर्न स्थानीय तहदेखि नै संगठनलाई सक्रिय बनाउने, जिम्मेवारी बाँडफाँट गर्ने र पार्टीका कार्यक्रमलाई जनस्तरसम्म पुर्याउने काममा ध्यान दिनुपर्ने सन्देश कार्यक्रममा दिइएको थियो।
अभियानका क्रममा पार्टीको संगठनात्मक अवस्था, आगामी कार्ययोजना, चुनावी रणनीति तथा स्थानीयस्तरमा पार्टीको गतिविधि विस्तार गर्ने विषयमा समेत छलफल भएको थियो। पार्टीका नीति तथा कार्यक्रमबारे आम नागरिकलाई जानकारी गराउने र स्थानीय जनतासँगको सम्बन्धलाई थप मजबुत बनाउने विषयलाई अभियानको प्रमुख उद्देश्यका रूपमा अघि सारिएको थियो।
यसैगरी विदेह नगरपालिकामा पार्टी कार्यालय स्थापना गर्ने विषयलाई समेत प्राथमिकतामा राखिएको छ। पार्टी कार्यालय स्थापनाले नियमित बैठक, संगठनात्मक छलफल, कार्यकर्ता परिचालन तथा जनतासँग प्रत्यक्ष संवाद गर्ने कार्यलाई सहज बनाउने अपेक्षा गरिएको छ।
कार्यक्रममा सहभागी नेता तथा कार्यकर्ताहरूले नगरपालिकाभित्र पार्टीको संगठनलाई थप व्यवस्थित बनाउँदै आगामी दिनमा जनमुखी गतिविधि विस्तार गर्नुपर्नेमा जोड दिएका थिए।
