जनकपुर, ७ कात्तिक । जनकपुरधामस्थित प्रसिद्ध जानकी मन्दिर परिसरमा लामो समयदेखि जीर्ण अवस्थामा रहेको वाटर फाउन्टेन हटाएर त्यस स्थानमा नेपालको राष्ट्रिय झण्डा राखिएको छ। पत्रकार सञ्जय यादवको अगुवाइमा फाउन्टेन हटाउने कार्य गरिएको हो।
वर्षौंदेखि बिग्रिएर प्रयोगविहीन अवस्थामा रहेको फाउन्टेनले मन्दिर परिसरको सौन्दर्यमा असर पारिरहेको भन्दै त्यसलाई हटाएर उक्त स्थानलाई नयाँ स्वरूप दिने प्रयास गरिएको बताइएको छ। फाउन्टेन हटाएपछि त्यहाँ नेपालको राष्ट्रिय झण्डा राखिएको छ।
राष्ट्रिय स्वतन्त्र पार्टी (रास्वपा) का र्यापिड एक्सन टिम विभाग प्रमुख अम्भु प्रसाद साहले लामो समयदेखि जीर्ण अवस्थामा रहेको फाउन्टेन हटाएर त्यस स्थानमा राष्ट्रिय झण्डा राखिएको जानकारी दिए। उनका अनुसार यस कार्यले जानकी मन्दिर परिसरलाई थप आकर्षक बनाउनुका साथै राष्ट्रिय पहिचान झल्काउने उद्देश्य राखेको छ।
धार्मिक तथा पर्यटकीय महत्त्व बोकेको जानकी मन्दिरमा दैनिक ठूलो सङ्ख्यामा स्वदेशी तथा विदेशी पर्यटक र श्रद्धालुहरू आउने गर्छन्। यस्तो महत्त्वपूर्ण स्थलको सरसफाइ, संरक्षण र सौन्दर्यीकरणमा ध्यान दिनुपर्ने स्थानीयको अपेक्षा छ।
मन्दिर परिसरलाई व्यवस्थित र आकर्षक बनाउन जीर्ण संरचनाको व्यवस्थापन, सरसफाइ तथा आवश्यक पूर्वाधारको संरक्षण महत्त्वपूर्ण मानिन्छ। राष्ट्रिय झण्डा राखिएसँगै उक्त स्थानको स्वरूपमा परिवर्तन आएको छ।
