काठमाडौं, २८ असोज । सरकारले दुई हजारभन्दा बढी विद्यार्थी अध्ययनरत १०९ सामुदायिक विद्यालयको भौतिक पूर्वाधार सुधारका लागि चालु आर्थिक वर्षमा ६ अर्ब ५४ करोड रुपैयाँ खर्च गर्ने भएको छ।
शिक्षा तथा खेलकुदमन्त्री सस्मित पोखरेलको सचिवालयका अनुसार पहिलो चरणमा ८९ विद्यालयका लागि ५ अर्ब ३४ करोड रुपैयाँ निकासा भइसकेको छ।
उक्त बजेटबाट विद्यालयमा १२ कोठे तीनतले भवन निर्माण गरिनेछ। प्रतिविद्यालय करिब ६ करोड रुपैयाँ लागत अनुमान गरिएको भवनमा कक्षाकोठा, प्रयोगशाला र पुस्तकालयको व्यवस्था गरिने मन्त्रालयले जनाएको छ।
मन्त्री पोखरेलले विद्यार्थीको चाप बढी भएका सामुदायिक विद्यालयको पूर्वाधार सुधारलाई प्राथमिकता दिइएको बताएका छन्। साथै, विद्यार्थी अभाव झेलिरहेका विद्यालयको अवस्था सुधार्दै सबै सामुदायिक विद्यालयको शैक्षिक गुणस्तर र भौतिक संरचना विकास गर्ने सरकारको लक्ष्य रहेको उनले बताएका छन्।
