भारत । भारतको बिहारस्थित वैशाली जिल्लाको राघोपुरमा गङ्गा नदी पार गर्ने क्रममा डुङ्गा पल्टिँदा कम्तीमा १३ जनाको मृत्यु भएको छ। मृतकमध्ये अधिकांश बालबालिका रहेको भारतीय सञ्चारमाध्यमले जनाएका छन्।
मङ्गलबार राति भोजमा सहभागी हुन जाँदै गरेका २५ जनाभन्दा बढी यात्रु सवार डुङ्गा नदीमा पल्टिएको थियो। दुर्घटनापछि उद्धार तथा खोजी कार्य सञ्चालन गरिएको छ। घाइतेमध्ये सात जनालाई थप उपचारका लागि पटना मेडिकल कलेज तथा अस्पताल पठाइएको जिल्ला अधिकारी वर्षा सिंहले जानकारी दिएकी छन्।
दुर्घटनामा बालबालिकाको मृत्यु भएपछि स्थानीय क्षेत्रमा शोक छाएको छ। उद्धार व्यवस्थापनप्रति असन्तुष्ट स्थानीयले जिल्ला अधिकारी सिंहलाई घेराउ गर्दै विरोधसमेत जनाएका छन्।
घटनापछि बिहार सरकारले मृतकका परिवारलाई जनही चार लाख भारतीय रुपैयाँ र भारतीय प्रधानमन्त्री कार्यालयले थप दुई लाख रुपैयाँ राहत दिने घोषणा गरेको छ। यसअनुसार मृतकका परिवारले जनही छ लाख भारतीय रुपैयाँ पाउनेछन्। घाइतेलाई पनि जनही ५० हजार रुपैयाँ राहत दिने घोषणा गरिएको छ।
डुङ्गा क्षमताभन्दा बढी यात्रु बोकेका कारण दुर्घटना भएको हो वा अन्य कारणले भन्ने विषयमा अनुसन्धान भइरहेको छ।
