विराटनगर, २७ असोज । मधेश प्रदेशका मुख्यमन्त्री कृष्णप्रसाद यादवले संविधानले प्रदान गरेका अधिकार पूर्ण रूपमा कार्यान्वयन गर्न प्रदेशहरूले भोग्दै आएका अवरोध हटाउनुपर्ने बताएका छन्।
अन्तरप्रदेश मुख्यमन्त्री सम्मेलनमा बोल्दै उनले संघीयताको प्रभावकारी कार्यान्वयनका लागि अधिकारसँगै आवश्यक कर्मचारी, बजेट, स्रोतसाधन र सम्पत्ति पनि प्रदेशलाई हस्तान्तरण गर्नुपर्नेमा जोड दिए।
मुख्यमन्त्री यादवले कृषि, व्यापार, पर्यटन, विपद् व्यवस्थापन, युवा प्रतिभा प्रवर्द्धन तथा नवप्रवर्तनका क्षेत्रमा अन्तरप्रदेश सहकार्य बढाउनुपर्ने बताए।
उनले साझा लगानी र आयोजना बैंकमार्फत प्रदेशहरूबीच सहकार्य गरी समृद्धि हासिल गर्न सकिने धारणा राखे।
प्रदेश प्रहरी ऐन बने पनि आवश्यक कानुन, जनशक्ति समायोजन तथा सम्पत्ति र अभिलेख हस्तान्तरण नहुँदा सीमापार अपराध नियन्त्रणमा चुनौती रहेको उनको भनाइ थियो।
