काठमाडौं, ९ असोज । पूर्वाधार विकासमन्त्री सुनील लम्साल र नेपालका लागि चिनियाँ राजदूत वाङ माओमिङबीच शुक्रबार सिंहदरबारमा भेटवार्ता भएको छ।
भेटमा रसुवामा बाढीले क्षति पुर्याएको पूर्वाधार पुनर्निर्माण, रसुवागढी–केरुङ नाका पुनः सञ्चालन तथा कोरला र तातोपानी नाकालाई प्रभावकारी बनाउने विषयमा छलफल भएको छ।
मन्त्री लम्सालले स्याफ्रुबेँसी–रसुवागढी सडक तत्काल सञ्चालनमा ल्याउन चीनको सहयोग आवश्यक रहेको बताए। साथै काठमाडौं–रसुवागढी–केरुङ सडकको दीर्घकालीन विकासका लागि नयाँ डीपीआर तयार गर्ने काम अघि बढेको जानकारी दिए।
राजदूत वाङले चीन नेपाललाई सहयोग गर्न तयार रहेको बताउँदै रसुवागढी नाकाको पुनर्निर्माणका लागि दीर्घकालीन र प्रभावकारी पूर्वाधार निर्माणमा जोड दिए। नेपालले विशेष प्रस्ताव पठाए आवश्यक समन्वय र सहयोग गर्ने उनले प्रतिबद्धता जनाए।
