काठमाडौं, ९ असोज। बंगालको खाडीमा विकसित न्यूनचापीय प्रणालीको प्रभावले देशभर वर्षा भइरहेको छ।
लगातारको वर्षाका कारण नदी तथा खोलामा पानीको बहाव बढ्नुका साथै पहिरोले विभिन्न स्थानमा राजमार्गसमेत अवरुद्ध भएका छन्।
मौसमविद्का अनुसार प्रणाली पूर्वबाट पश्चिमतर्फ सर्दै रहेकाले आज रातिदेखि पश्चिम नेपालमा वर्षा थप बढ्ने सम्भावना छ। पूर्वी क्षेत्रमा भने शनिबार वर्षाको मात्रा केही घट्न सक्ने जनाइएको छ।
बाढी पूर्वानुमान महाशाखाले आगामी दुई दिन विभिन्न जिल्लाका नदी तथा खोलामा बहाव बढ्ने र आकस्मिक बाढी आउन सक्ने चेतावनी दिएको छ। शुक्रबार १२ जिल्ला उच्च जोखिममा रहेकामा शनिबार उच्च जोखिममा पर्ने जिल्लाको संख्या २६ पुग्ने जनाइएको छ।
यस्तै, सप्तकोशीमा समेत पानीको बहाव बढ्दो क्रममा रहेकाले तल्लो तटीय तथा डुबान प्रभावित क्षेत्रमा पर्सिसम्म उच्च सतर्कता अपनाउन आग्रह गरिएको छ।
