न्युयोर्क, ७ असोज । अमेरिकी राष्ट्रपति डोनाल्ड ट्रम्पले इरानसँग शान्ति सम्झौता गर्ने वा सैन्य कारबाही अघि बढाउने विषयमा आफूले ‘ठूलो निर्णय’ लिनुपर्ने बताएका छन्।
संयुक्त राष्ट्रसंघको महासभालाई सम्बोधन गर्दै उनले सम्झौता नभए इरानविरुद्ध थप कडा कदम चाल्ने चेतावनी दिए। ट्रम्पले इरानलाई आणविक हतियार बनाउनबाट रोक्न अमेरिकी सैन्य कारबाही आवश्यक भएको दाबी गर्दै ‘शक्तिको माध्यमबाट शान्ति’ कायम गर्ने बताएका छन्। उनले नोभेम्बरको अमेरिकी मध्यावधि निर्वाचनपछि इरानसँग सम्झौता हुन सक्ने विश्वास पनि व्यक्त गरे।
यसैबीच अमेरिका र इरानका प्रतिनिधिबीच न्युयोर्कमा मध्यस्थमार्फत करिब तीन घण्टा वार्ता भएको छ। इरानले युद्ध अन्त्य र अमेरिकी सैन्य गतिविधि रोक्नुपर्ने सर्त अघि सारेको जनाएको छ भने अमेरिकी पक्षले वार्तालाई रचनात्मक र आशाजनक भनेको छ।
महासभामा ट्रम्पले रुस–युक्रेन युद्ध कूटनीतिक माध्यमबाट अन्त्य गर्ने दाबी दोहोर्याउँदै एआईमा अमेरिकी नेतृत्व कायम राख्ने बताएका छन्। उनले संयुक्त राष्ट्रसंघको भूमिकामाथि आलोचना गर्दै राष्ट्रिय सार्वभौमिकता र अमेरिकी सैन्य शक्तिमा जोड दिएका छन्।
