काठमाडौँ, ३० भदौ । प्रतिनिधि सभाको कार्यव्यवस्था परामर्श समितिको बैठक आज दिउँसो १२ बजे बस्दैछ।
सभामुख डोलप्रसाद अर्यालले संसद्लाई प्रविधिमैत्री बनाउने तथा सांसदले उठाएका जनसरोकारका विषयलाई प्रभावकारी रूपमा सम्बोधन गर्ने विषयमा छलफल गर्न बैठक बोलाएका हुन्।
बैठकमा मुख्य रूपमा ‘डिजिटल संसद्’ अवधारणाबारे छलफल हुनेछ। सांसदहरूले शून्य, आकस्मिक र विशेष समयमा उठाएका विषयलाई डिजिटल प्रणालीमार्फत सम्बन्धित मन्त्रालय तथा निकायसँग जोड्ने तयारी गरिएको छ।
यस्तै, आज दिउँसो १ बजे प्रतिनिधि सभाको बैठक बस्नेछ। बैठकमा विभिन्न मन्त्रालयसँग सम्बन्धित मौखिक प्रश्नको मन्त्रीहरूले जवाफ दिने तथा एसियाली विधायिकी संस्थाहरूको परिषद्को सदस्यता प्राप्तिसम्बन्धी प्रस्ताव अनुमोदन गर्ने कार्यसूची रहेको छ।
