काठमाडौं, २९ भदौ । प्रधानमन्त्री वालेन्द्र शाहले बालबालिकामा गरिने लगानी राष्ट्रको सुरक्षित र समृद्ध भविष्यका लागि महत्वपूर्ण रहेको बताएका छन्।
राष्ट्रिय बाल दिवस २०८३ को अवसरमा शुभकामना सन्देश जारी गर्दै प्रधानमन्त्री शाहले देश तथा विदेशमा रहेका सबै नेपाली बालबालिकाको सुख, समृद्धि, स्वास्थ्य, सफलता र उज्ज्वल भविष्यको कामना गरेका छन्।
यस वर्ष ‘बालापनको रक्षा : भविष्यको सुरक्षा’ भन्ने नाराका साथ राष्ट्रिय बाल दिवस मनाइँदैछ। बालबालिकाको वर्तमान सुरक्षित, अधिकारसम्पन्न र बालमैत्री बनाउन सके मात्र समृद्ध भविष्य निर्माण गर्न सकिने प्रधानमन्त्री शाहले बताएका छन्।
उनले बालअधिकारको सम्मान, संरक्षण र प्रवर्द्धनमा सक्रिय अभिभावक, शिक्षक, जनप्रतिनिधि, नागरिक समाज, सञ्चारकर्मी तथा सरोकारवालाप्रति सम्मान व्यक्त गरेका छन्।
प्रधानमन्त्री शाहले बालबालिकाका संवैधानिक तथा कानुनी अधिकारलाई व्यवहारमै सुनिश्चित गर्न सङ्घ, प्रदेश र स्थानीय तहबीच प्रभावकारी समन्वय र सहकार्य आवश्यक रहेको उल्लेख गरेका छन्।
