नयाँ दिल्ली । भारतको राजधानी नयाँ दिल्लीमा आजदेखि ११ सदस्यीय ब्रिक्सको शिखर सम्मेलन सुरु हुँदैछ। सम्मेलनमा करिब एक दशकपछि भारतीय प्रधानमन्त्री नरेन्द्र मोदी, रुसी राष्ट्रपति भ्लादिमिर पुटिन र चिनियाँ राष्ट्रपति सी चिनफिङ एकै मञ्चमा सहभागी हुँदैछन्।
गलवान सीमा झडपपछि राष्ट्रपति सीको यो पहिलो भारत भ्रमण भएकाले सम्मेलनलाई कूटनीतिक रूपमा महत्त्वपूर्ण मानिएको छ। ११ सदस्य राष्ट्रसँगै १० साझेदार मुलुकका प्रतिनिधि सहभागी हुने सम्मेलनमा आर्थिक तथा व्यापारिक विषय मुख्य प्राथमिकतामा छन्।
अध्यक्ष राष्ट्र भारतले सदस्य राष्ट्रबीच अमेरिकी डलरको निर्भरता घटाउँदै राष्ट्रिय मुद्रामा कारोबार बढाउने र डिजिटल भुक्तानी प्रणाली तथा डिजिटल मुद्रालाई आपसमा जोड्ने प्रस्ताव अघि सारेको छ। विश्व जनसंख्याको करिब आधा हिस्सा समेट्ने ब्रिक्सले विश्व अर्थतन्त्रमा समेत ठूलो प्रभाव राख्छ।
