काठमाडौं, २६ भदौ। भदौ १० गते रसुवाको भोटेकोशीमा आएको बाढीका कारण त्रिशूली-३ ‘ए’ को सुरुङभित्र फसेका सञ्जय साह १० दिनपछि उद्धार भई उपचारपछि अस्पतालबाट डिस्चार्ज भएका छन्।
सुरुङबाट उद्धार गरिएपछि उनलाई वीरेन्द्र सैनिक अस्पताल छाउनीमा भर्ना गरिएको थियो। सात दिनको उपचारपछि स्वास्थ्यमा सुधार आएपछि शुक्रबार उनलाई घर पठाइएको सैनिक प्रवक्ता सहायक रथी राजाराम बस्नेतले जानकारी दिए।
आयोजनाका मेकानिकल फोरम्यान साहलाई नेपाली सेना, सशस्त्र प्रहरी, नेपाल प्रहरी र विज्ञसहितको संयुक्त टोलीले उद्धार गरेको थियो। उनीसँगै सुरुङमा फसेका अर्का व्यक्तिको पनि सकुशल उद्धार गरी हेलिकप्टरबाट काठमाडौं ल्याइएको थियो।
