राजविराज, २५ भदौँ । सप्तरीको राजविराजस्थित गजेन्द्रनारायण सिंह सगरमाथा अस्पतालले समयमै भर्ना नलिएपछि एक महिलाले अस्पताल परिसरअगाडिको फुटपाथमै बच्चा जन्माएको घटना सार्वजनिक भएको छ ।
राजविराज नगरपालिका–१४ पर्साहीकी बबिता पासवानलाई मंगलबार राति सुत्केरी व्यथा लागेपछि उनका श्रीमान् हरेराम पासवानसहित आफन्तले सिटी रिक्सामा अस्पताल पुयाएका थिए ।
बुधबार बिहान करिब २ : ३० बजे उनले अस्पतालअगाडिको फुटपाथमै छोरालाई जन्म दिएको बताइएको छ । बबिताका अनुसार अस्पतालको प्रसूति विभागमा कार्यरत स्वास्थ्यकर्मीले अल्ट्रासाउन्ड तथा रगत र पिसाब परीक्षण गर्नुपर्ने भन्दै त्यसका लागि करिब २ हजार ५०० रुपैयाँ लाग्ने बताएका थिए ।
आफू विपन्न परिवारको भएको र तत्काल रकम नभएको जानकारी गराउँदा पनि भर्ना नलिएको उनको दाबी छ ।यसअघि आफ्ना तीन सन्तान सामान्य रूपमा जन्मिएको र कुनै परीक्षण नगराएको बताउँदै बबिताले तत्काल प्रसूति गराउन आग्रह गरे पनि स्वास्थ्यकर्मीले परीक्षणबिना प्रसूति गराउन नमिल्ने भन्दै बाहिर जान भनेको आरोप लगाएकी छन् ।
घटनासँग सम्बन्धित भिडियो सार्वजनिक भएपछि सरकारी अस्पतालको सेवा प्रवाहमाथि प्रश्न उठेको छ । सामाजिक सञ्जालमा घटनाको आलोचना गर्दै जिम्मेवार पक्षमाथि छानबिन तथा कारबाहीको मागसमेत भइरहेको छ ।
यता अस्पताल प्रशासनले भने बबिता राति करिब २ बजे अस्पतालमा भर्ना भएको र ल्याब परीक्षणका लागि बाहिरिएको दाबी गरेको छ । घटनाबारे सत्यतथ्य पत्ता लगाउन छानबिन समिति गठन गर्ने अस्पतालले जनाएको छ ।
