काठमाडौँ, २३ भदौ । जेन-जी आन्दोलनका क्रममा ठूलो क्षति व्यहोरेको भाटभटेनी सुपरमार्केट एक वर्षमै पुनः व्यावसायिक लयमा फर्किने प्रयासमा छ।
भाटभटेनीका २८ शाखामध्ये १२ वटामा आगजनी तथा ९ वटामा तोडफोड र लुटपाट भएको थियो। क्षतिग्रस्त २१ शाखामध्ये १७ वटा पुनः सञ्चालनमा आइसकेका छन्।
आगजनीबाट ध्वस्त १२ शाखामध्ये ८ वटा सञ्चालनमा आएका छन् भने धरान, नक्साल, हेटौँडा र दमक शाखा पुनर्निर्माणको चरणमा छन्।
कम्पनीले असोज मसान्तसम्म बाँकी शाखा पनि सञ्चालनमा ल्याउने लक्ष्य राखेको छ। पुनर्निर्माणसँगै भाटभटेनीले व्यवसायलाई ‘अन्तर्राष्ट्रिय मोडल’मा विस्तार गर्ने योजना अघि बढाएको छ। यसैक्रममा भक्तपुरको राधेराधे शाखामा रात्रिकालीन सेवा सुरु गरिएको छ।
