काठमाडौँ, २४ भदौ । नेपाली कांग्रेसका सभापति गगन थापाले गत भदौ २३ र २४ गते भएका घटनाको निष्पक्ष अनुसन्धान गरी दोषीलाई कारबाही गर्न सरकारसँग माग गरेका छन्।
बीपी स्मृति दिवसका अवसरमा भिडियो सन्देश जारी गर्दै थापाले भदौ २३ गते भएको दमन, आन्दोलनमा भएको घुसपैठ तथा भदौ २४ गते भएको हिंसा र तोडफोडबारे सत्यतथ्य सार्वजनिक गर्नुपर्ने बताए।
उनले सिंहदरबार, अदालतलगायत सार्वजनिक संरचनामा भएको क्षतिको जिम्मेवार व्यक्ति तथा हिंसा भड्काउनेहरूको पहिचान गरी कानुनी कारबाही गर्नुपर्नेमा जोड दिए। सरकारले निष्पक्ष छानबिन गर्ने प्रतिबद्धता जनाए पनि अनुसन्धान कहाँ पुगेको छ भन्नेबारे प्रश्न गर्दै थापाले ढिलाइ नगर्न आग्रह गरे।
उनले भदौ २३ र २४ गते अपराध गर्ने जोसुकै भए पनि दण्डित हुनुपर्ने भन्दै दण्डहीनता कायम रहे भविष्यमा यस्ता घटना दोहोरिन सक्ने चेतावनी दिए।
