जनकपुर, १७ भदौ । महोत्तरीको पिपरा गाउँपालिका–३ बन्चटोलवाका दलित समुदायले पुस्तौँदेखि पूजा गर्दै आएको चम्पा देवीको धार्मिकस्थलमा मन्दिर निर्माण गर्न खोज्दा आफूहरूमाथि जातीय विभेद, कुटपिट र धम्की भएको आरोप लगाएका छन्।
बुधबार पत्रकार सम्मेलन गर्दै राजेश दास, गणेश दास तत्मा, रामनाथ पासवान र भोला दासलगायतले आफ्नै चन्दा संकलन गरी पुरानो मन्दिर पुनर्निर्माण गर्न खोज्दा केही स्थानीयले अवरोध गरेको बताए।
कुटपिटबाट एक जनाको नाकको हड्डी भाँचिएको तथा घाइतेको उपचार रिपोर्ट हुँदासमेत प्रहरीले जाहेरी दर्ता नगरेको उनीहरूको दाबी छ।
दलित समुदायले गाउँपालिका अध्यक्ष र प्रमुख जिल्ला अधिकारीमाथि समेत दबाब, अपमानजनक व्यवहार र विभेद गरेको आरोप लगाएका छन्।
भदौ १६ गतेको छलफलमा आफूहरूलाई मन्दिर अन्यत्र बनाउन दबाब दिइएको तथा मुद्दा दर्ता गरे कारबाहीको धम्की दिइएको उनीहरूको आरोप छ।
पीडित पक्षले घटनाको निष्पक्ष छानबिन गरी जातीय विभेद, कुटपिट र धम्कीमा संलग्न भनिएका व्यक्तिमाथि कानुनी कारबाही गर्न राष्ट्रिय दलित आयोगसमक्ष माग गरेको छ।
