काठमाडौं, १४ भदौ । गत भदौ १० गते आएको भीषण बाढीपछि माथिल्लो त्रिशूली–३ ‘ए’ जलविद्युत् आयोजनाको टनेलभित्र फसेकाहरूको उद्धारका लागि सरकारले सम्पूर्ण संयन्त्र परिचालन गरेको छ।
ऊर्जा मन्त्रालयका अनुसार फसेकाहरूको जीवनरक्षाका लागि उद्धार तथा उत्खनन कार्य युद्धस्तरमा भइरहेको छ। टनेलमा जमेको गेग्रान हटाउनेसँगै अक्सिजन आपूर्ति सहज बनाउन भेन्टिलेसनको व्यवस्था पनि मिलाइएको छ।
उद्धार टोलीले टनेलभित्र घस्रिएर जान सकिने साँघुरो मार्ग निर्माण गरिरहेको छ। उक्त मार्गबाट टनेलको भित्री भाग निरीक्षण गरी उद्धारको प्रयास गरिनेछ।
उद्धार सम्भव नभए वैकल्पिक योजनाअनुसार नेपाली सेनाको प्राविधिक टोलीले नियन्त्रित विस्फोटमार्फत अवरोध हटाउने तयारी गरिएको मन्त्रालयले जनाएको छ। फसेकाहरूलाई सकुशल उद्धार गर्न कुनै कसर बाँकी नराख्ने सरकारको प्रतिबद्धता छ।
