जनकपुरधाम, ५ भदौँ । जनकपुरधाममा अतिक्रमणमा परेको गुठीको जग्गा खाली गराउने अभियानअन्तर्गत भोलिदेखि डोजर चलाइने भएको छ ।
गुठी जग्गाको संरक्षण तथा अतिक्रमण हटाउने कार्यान्वयन समितिले पहिलो चरणमा अतिक्रमित पोखरीका डिल खाली गराउने अभियान सुरु गर्न लागेको हो ।
समितिका सदस्य सचिव जनक पोखरेलका अनुसार पहिलो चरणमा पहिचान गरिएका ५० वटा अतिक्रमित पोखरीलाई अतिक्रमणमुक्त गराइनेछ । यसका लागि गत साउन १ गते नै सम्बन्धित ठाउँ खाली गर्न सार्वजनिक सूचना जारी गरिएको र शुक्रबार माइकिङसमेत गरिएको उनले बताए ।
उनका अनुसार अतिक्रमण हटाउने कार्ययोजनाअनुसार पहिलो चरणमा पोखरी, दोस्रो चरणमा मन्दिर परिसर र तेस्रो चरणमा अन्य गुठी जग्गामा भएको अतिक्रमण हटाइनेछ ।
अतिक्रमण हटाउने क्रममा २०६२ सालमा जनकपुरको गुठी जग्गा पहिचान तथा अतिक्रमणको अवस्था अध्ययन गर्न भोजराज घिमिरेको नेतृत्वमा गठित कार्यदलको प्रतिवेदनलाई आधार बनाइएको छ ।
